Sisindiran

Sisindiran nyaéta puisi tradisional Sunda anu mibanda cangkang jeung eusi. Kecap ‘sindir’ dina sisindiran mibanda harti omongan, atawa cariosan anu henteu togmol  (langsung).

Dina sastra Sunda sisindiran disebut karya sastra anu ngagunakeun rakitan basa kalawan dibalébérkeun. Dina sisindiran eusi atawa maksud anu dikedalkeun teh dibungkus ku cangkangna. Sisindiran deukeut pisan jeung kahirupan masarakat Sunda sabab manéhna bisa ngutarakeun fénoména nu aya di sakurilingna.

Sisindirian bisa dibagi jadi 3 jinis, diantarana :

Rarakitan, tina kecap asal ‘rakit’ atawa sarakit. Rarakitan bisa dibagi jadi 3 rupa, aya rarakitan silih asih (nyaritakeun kisah cinta, atawa birahi), rarakitan piwuruk (naséhat), ogé rarakitan sesebréd (humor).

Conto rarakitan :

Batur mah ka marga cinta

Kuring mah ka nagrak baé

Batur mah dipika cinta

Kuring mah ditolak baé

Daék kuring nyabut sampeu

Asal dibéré beutina

Daék kuring nyebut eceu

Asal kuring dibéré adina

Munjung ulah ka gunung

Muja ulah ka sagara

Munjung kudu ka indung

Muja kudu ka papada

Tong tiwu-tiwu teuing

Dék bonténg balig baé

Tong kitu-kitu teuing

Dék goréng baréto baé

Paparikan, tina kecap asal ‘parek’ anu hartina deukeut. Sarua jeung rarakitan, paparikan ogé bisa dibagi jadi 3 rupa, aya paparikan silih asih (nyaritakeun kisah cinta, atawa birahi), paparikan piwuruk (naséhat), ogé paparikan sesebréd (humor).

Conto paparikan :

Cau naon-cau naon

Cau ambon dina nyiru

Bau naon bau naon

Bau hitut nu di juru

Di dieu loba nyéré

Nyéré kapéntil kabéh

Di dieu loba awéwé

Awéwé caréntil kabéh

Ka leuweung-leuweung ku dangdeur

Kembang bonténg di astana

Ka deungeun-deungeun ku bageur

Ka kuring kieu rasana

Tari kolot bojong kaso

Baban loba hayamna

Beuki kolot beuki nyaso

Beuki loba kahayangna

Samping hideung dina bilik

Kumaha moékeunana

Bujur hideung euweuh milik

Kumaha gentikeunana

Kincir kita kincir kita

Kincir ngait kana awi

Pikir cinta-pikir cinta

Pikir ngait ka sim abdi

Wawangsalan, tina kecap ‘wangsal’ anu hartina balik. Wawangsalan biasana diwangun ku sindir jeung eusi, dina sindir diwangun deui ku wangsal jeung cangkang.  Aya ogé wawangsalan anu mangrupa Tatar Ucingan.

Conto wawangsalan :

Daging leutik ditiiran

Abi mah sok nyeri haté

Eusina nyaéta : Saté

Beurit siit samadarat

Kapiraray siang wengi

Eusina nyaéta : Oray

Durudugdag durudugdag

Meuli baju teu ka bedag

Eusina nyaéta : Bedug

date : 020311